Snilldar gúllas

Ég lenti í því síðasta mánudag kl. 17:30 að uppgötva það að ég var ekkert búin að pæla í kvöldmat. Ísskápurinn svo gott sem tómur. Þá voru góð ráð dýr. Ég kippti gúllaskjöti upp úr kistunni og því sem til var í ísskápnum. Úr varð þessi gúllasréttur sem sló í gegn hjá öllum í familíunni. Sá yngsti sem heldur að kjötbitar séu ómanneskjuleg fæða fannst sósan og hrísgrjónin góð sem er toppeinkunn hjá þeim sem til þekkja.

Án frekari málalenginga að þá er hér þessi snilldar réttur :)

Gúllas tóma ísskápsins
600 g gúllas (nauta eða kinda)
1 laukur
4 hvítlauksgeirar
1 appelsínugul papríka
200 g hakkaðir niðursoðnir tómatar
5 dl rjómi (má alveg setja 2,5 rjómi og 2,5 vatn)
3 msk rjómaostur
1 grænmetisteningur (eða sambærilegan kraft)
1 nautakjötsteningur (eða sambærilegan kraft)
2 lárviðarlauf
Pipar

Skerið laukinn og hvítlaukinn og steikið á stórri pönnu í smjörklípu. Þegar laukurinn fer að verða glær að setja þá papríkuna út á, steikja smávegis og bæta síðan gúllasbitunum út á. Steikið bitana þar til þeir verða nær lokaðir og setjið þá út í allt nema piparinn. Sjóðið saman í 30-40 mín á miðlungshita. Ef hún fer að verða of þykk sósan að þá er um að gera að bæta smávegis vatni við. Piprið síðan gúllasið eftir smekk og ef ykkur finnst vanta salt þá getið þið bætt því við en það er svo mikið saltmagn í teningunum að mér fannst ekki vanta salt.

Borið fram með hrísgrjónum og grænmeti.

Ef það er til grænmeti í ísskápnum að þá er um að gera að bæta því út í með papríkunni en ég átti ekkert annað en papríku í fátæklega ísskápnum mínum þennan daginn. En gott var þetta!

Kjúklingur þrisvar sinnum, annar hluti

Þá er komið að seinni réttinum sem var í raun afgangsréttur af afgangsréttinum, þeim sem ég deildi með ykkur í gær.

Ég geri það alltaf við brauð, sem að ég hef bakað sem er orðið hart, að skella því í matvinnsluvélina og rífa það niður í öreindir. Síðan sting ég því í frystinn til að bíða þess tíma þegar ég þarf að raspa eitthvað. Þetta er lang besta raspið og mér dettur í hug að kaupa rasp út í búð eftir að ég tók upp á þessu. Þetta rasp kom sér líka vel við gerð þessa rétts.

Rísottó buff

Afgangur af kjúlkingarísottóinu.
100 g beikon (má auðvitað vera meira fyrir beikonunnendur).
Egg, pískað og kryddað með salti og pipar
Rasp

Steikja beikonið á pönnu þar til það er rétt að verða stökkt, saxið það niður í bita. Hafið rísottóið í skál og blandið beikoninu við og hrærið því vel saman við. Búið síðan til lófarstór buff, veltið því upp úr egginu, því næst raspinum og steikið á pönnunni sem beikonið var steikt á (en verið búin að hella fitunni af).

Ég bar buffið fram með afgangnum af graskerinu frá kvöldinu áður og hvítlaukssósu úr grískri jógúrt (3 kúfaðar msk grísk jógúrt, 2 hvítlauksgeirar, 1 tsk hvítlauksedik, salt og pipar og þynnt út í ásættanlega þykkt með vatni). Við erum voðalega hrifin af þessari hvítlaukssósu okkar.

Þetta má auðvitað gera við öll rísottó sem gerð eru og alltaf hægt að leika sér að því að bæta út í þau.

Kjúklingur þrisvar sinnum, fyrri hluti

Eins og kom fram um daginn að þá er ég með "ofnæmi" fyrir því að henda mat. Ég eldaði eitt sunnudagskvöldið fyrir okkur heilan kjúkling og var með mikið meðlæti með. Af þeim sökum var helmingurinn af kjúklingnum eftir. Sá helmingur dugði í tvo aðra rétti sem ég ætla að deila með ykkur. Hér má sjá fyrri réttinn, sá seinni kemur á morgun en hann er eiginlega afgangsmatur af afgangsmatnum. Þetta er ef til vill skrítið áhugamál, þ.e. að fá einstaka ánægju af því að gera afgangsmat en launin eru verulega góð á bragðið.

Kjúklingarisottó

2 skallottulaukar
3 hvítlauksgeirar
6 msk smjör
1 l kjúklingasoð
afgangskjúklingur skorinn í bita
1 dl villisveppir
3 dl hrísgrjón
5 sveppir (hvítir eða kantarellu)
2 dl rjómi
2 dl parmesan, rifinn
1/2 villisveppaostur, rifinn
1 msk timían
1 msk steinselja
Salt og pipar

Ég nota stóra stálpönnu til að gera risottóin mín, mér finnst hún þægilegust í það hlutverk.

Setjið villisveppina í kalt vatn og skolið þá örlítið, setjið þá síðan í skál með köldu vatni sem flýtur aðeins yfir og leyfið þeim að mýkjast. Steikið skallottulaukana og hvítlauksgeirana í smjörinu þar til glærir. Á meðan skal hita upp einn líter af soði og setja kjúklingabitana út í það. Þegar laukarnir eru orðnir glærleitir skal setja hrísgrjónin út í og hita þau aðeins. Setjið hvítu sveppina um leið út í og hrísgrjónin.  Þegar hrísgrjónin hafa hitnað skal setja 1/4 af soðinu út í. Bætið allt smá og smá af soðinu út í þegar hrísgrjónin eru við það að klára að draga í sig frá síðasta skammti. Rétt áður en settur er síðasti skammturinn af soðinu skal hella vökvanum af villisveppunum út í risottóið, saxa sveppina og setja þá út í. Þegar síðasti hlutinn af soðinu er að verða búinn á pönnunni skal bæta út í rjómanum,  parmesan ostinum, villisveppaostinum og kryddinu. Saltið og piprið eftir smekk. Hrærið þar til risottóið er þykkt og kremað, þá er það tilbúið.

Ég bar risottóið fram með fersku salati, ristuðu hvítlauksbrauði og gljáðu graskeri (grasker sem heitir "butternut squash" á ensku).

Gljáð grasker

700 g grasker skorið í ferninga
60 g smjör
50 g púðursykur
1 1/2 tsk salt
1 1/2 tsk pipar

Bræðið smjörið og hrærið við það púðursykur, salt og pipar. Veltið graskersferningunum upp úr því, setjið í ofnfast mót eða skúffu og steikið inni í ofni í 30 mínútur við 180 °C. Hrærið graskerið reglulega upp svo að það steikist jafnt.

Hlakka til að deila hinni uppskriftinni með ykkur á morgun :)

Gulrótarkaka sem heillar

Ég hef ávallt verið mikið fyrir gulrótarkökur en þær eru mjög misjafnar. Ég er ef til vill verulega dómhörð á kökur af þessari tegund en það hefur þó skilað sér í því að ég hef fundið mér uppskrift sem ég er afskaplega ánægð með. Það vill líka svo vel til að í hvert skipti sem ég býð upp á hana er alla vega einn til tveir sem að hrósa kökunni og segja að þeir hafi sjaldan smakkað jafn góða gulrótarköku.

Eins og með alla góða hluti í lífinu að þá eru þeir enn betri ef fólk deilir þeim með öðrum og því ákvað ég að deila þessari uppáhalds gulrótarkökuuppskriftinni minni með ykkur.

Gulrótarkaka Hilju

Þessi uppskrift gefur tvo botna. Það er hægt að hafa hana tveggja hæða en ég kýs að hafa hana á einni hæð og þá fæ ég bara tvær kökur. Mér finnst hún betri þannig. 

2 bollar sykur (5 dl)

1/2 bolli matarolía (Isio eða ólífu) - (1,25 dl)

4 stór egg 

Þetta er þeytt mjög vel saman.

2 bollar hveiti (5 dl)

2 tsk matarsódi

2 tsk kanill

1 tsk salt

2 bollar rifnar gulrætur (5 dl)

Þessu blandað saman við blautu efnin.

Hellt í tvö stór tertuform (26 cm)

Bakað við 200°C í 30-40 mín eða þar til pinninn kemur þurr upp úr.

Krem á tvo botna 

Helmingið ef þið ætlið bara að nota einn botn.

250 g rjómaostur

1/3 bolli smjör

1/2 tsk vanilludropar

Þeytt mjög vel saman

2 bollar flórsykur (5 dl)

Allt hrært saman. 

Síðan er bara að skella kreminu á kælda botnana og njóta til hins ýtrasta. Ég fæ bara vatn í munninn við tilhugsunina um þessa dýrindis köku. 

Njótið!

Endurunnið grillkjöt?

Ef það er eitthvað sem að ég þoli ekki í eldhúsinu að þá er það að henda mat. Ég lenti í því í vikunni að ég var komin með grjónagraut, hakkabollur og afgang af grísabógssteik í ísskápinn. Einn einstakur réttur nægði ekki fyrir alla familíuna þannig að þá var eina ráðið að hafa allt saman. Þegar ég og Bjössi kynntumst á sínum tíma að þá var hann ekki mikið fyrir endureldaðan mat og sagði hreint út að upphitaður matur væri vondur.

Þeir sem þekkja mig vita ofur vel að þegar svona er sagt við mig geri ég allt til að breyta skoðun þeirra því ég veit að slíkur matur getur verið ofur góður. Ég braut því heilann yfir þessum 270 g af grísabógssteik sem ég átti eftir, skoðaði uppskriftir en fann ekkert spennandi. Sá reyndar nokkrar uppskriftir þar sem að grískjöt hafði verið rifið niður og blandað við BBQ sósu og sett á hamborgarabrauð. Þá fékk ég hugmyndina. Ég geri borgara úr þessu kjöti.

Ég byrjaði á því að skera kjötið í minni bita og setja í blandarann minn og stilla á söxun. Ég er svo heppin að eiga Kitchen Aid blandara með hinum margvíslegu stillingum. Ég saxaði þar til það leit út eins og meðfylgjandi mynd sýnir.







Ég setti í skál:

• 270 g af kjötikurlinu (sem var öll heildin hjá mér.
• Eitt pískað eggi 
• 1 msk af Worcestershire sósu
• 20 g af smátt söxuðum lauk ... má alveg setja aðeins meira af honum en það fer bara eftir smekki og vilja fólks. Við sjálf viljum ekki of mikið af lauk í matnum. 

Síðan er bara að hnoða þetta saman og búa til tvo hamborgara úr kjötinu og steikja á pönnu. 

Ég setti smá smjörklípu á pönnuna því mér finnst það gefa smá bragð í kjötið ásamt því að mér finnst það ekki jafn þurrt. Þegar ég var búin að snúa kjötinu einu sinni skellti ég sveppum með á pönnuna og síðan smávegis af beikoni sem var við það að skemmast inni í ísskápnum en það hafði orðið afgangs á afmælisdaginn minn. Ég steikti tvisvar á hverri hlið á borgaranum og þegar kom að því að snúa honum við í síðasta skipti smurði ég smá BBQ sósu á botninn sem átti eftir að steikja í annað skiptið. Setti síðan ost á toppinn. 

Borgarana setti ég á venjulegt hamborgarabrauð með sósu sem er gerð úr grískri jógúrt og nóg af graslauk sem er þynnt út með vatni. Nóg af grænmeti, borgarinn ofan á það og sveppablandan næst á eftir ásamt sósu. Hatturinn kemur síðan efst. 

Áður en ég byrjaði á borgurunum útbjó ég léttvægari hasselback kartöflur, þ.e. skar bara örfáar ræmur og ekki djúpt niður, smurði með ólífuolíu, setti pipar og salt á þær og henti þeim síðan inn í ofn við 200°C í 30-40 mínútur. Þegar þær voru hálfnaðar með eldunartímann setti ég smá smjörklípu ofan á og tíu mínútum áður penslaði ég þær með því sem var í botninum á forminu.

Ég lýg því ekki ... þetta "upphitaða" kjöt varð að alveg virkilega góðum borgara.

Endurvinnsla? 

Verði þér að góðu. 

Brúðkaupsgaman

Góðir vinir okkar, þau Halli og Ásta, giftu sig laugardaginn 21. júní. Þetta var yndisleg athöfn undir berum himni rétt við Nauthól. Maðurinn minn var beðinn um að vera veislustjóri og ég fékk að vera með.

Við vinnum afskaplega vel saman. Ég fæ hugmyndir og hann útfærir þær þannig að þær séu framkvæmanlegar og á það sérstaklega við þetta "brúðkaupshjól". Ég kom með hugmyndina og hvernig ég sæi þetta fyrir mér og Bjössi smíðaði standinn meðan ég útbjó hjólið sjálft með svörtu teipi og hjartalaga miðum. Í brúðkaupsveislunni sjálfri áttu borðin að senda af og til fulltrúa sinn til að snúa því. Flest á hjólinu sneri að eitthverju sem háborðið átti að framkvæma. Virkilega skemmtilegt tvist í brúðkaupsveislunni og við mjög ánægð með útkomuna.

Þetta vinafólk okkar á heima úti í Sviss og þar af leiðandi vildu þau helst fá pening í brúðkaupsgjöf þar sem þau vildu ekki vera að ferðast með mikið af dóti til Sviss. Við vinirnir tókum okkur saman í gjöf og ég gerði fiðrildi úr tveimur af þúsund krónunum, teiknaði og málaði myndina í rammann og skundaði síðan í Ikea þar sem ég fann þennan fallega bakka, fjólubláa skraut og rammann. Mér finnst svo leiðinlegt að gefa bara pening í umslagi og tók þennan vinkil á gjöfina. Ég er mjög sátt við útkomuna og vinirnir virtust ánægðir með hvernig ég leysti gjafarútlitið af hendi. :)

Það er hægt að finna margar hugmyndir um hvernig hægt er að brjóta saman peninga á youtube, bara slá upp money origami í leitarstikunni og þá koma trilljón hugmyndir og fínar leiðbeiningar, síðan er það bara að finna það sem að hentar manni best. 

Ítalskt kartöflusalat

Virkilega gott kartöflusalat hér á ferð. Ég sjálf er ekki mikið fyrir kartöflusalat með majonesi eða sýrðum rjóma svo að þetta salat hitti beint í mark hjá mér. Þetta er bæði létt, sumarlegt og bragðgott.

Ítalskt kartöflusalat 

• 800 g kartöflur - skornar í báta
• smá olía til að setja yfir kartöflurnar
• salt og pipar
  
  Setjið kartöflurnar í eldfast mót, setjið olíu yfir og salt og pipar. Blandið saman og bakið inni í ofni við 220°C í um 30 mínútur. Veltið þeim reglulega til. Þegar þær eru fullabakaðar, takið þær út úr ofninum og kælið.
  
• 10 sólþurrkaðir tómatar, saxaðir í smáa bita
• 1 dl af smátt saxaðri ferskri steinselju (helst flatlaufa)
• 1,5 dl valhnetur (má líka blanda valhnetum og pekanhnetum)
• 1 þríhyrningur parmesanostur, gróft rifinn.
  
  Ristið hneturnar á bökunarpappír í ofni, ca. 4 mínútur í 200°C heitum ofni. Þær eiga að brúnast örlítið en alls ekki var svartan lit á sig. Kælið þær síðan örlítið og saxið í smærri bita. Blandið síðan öllum ofangreindum hráefnum saman. 

• 1 dl olía (ólífu eða Isio)
• 1 msk dijon sinnep 
• 2 msk balsamik edik
  
  Pískið dressinguna vel saman og setjið yfir kartöflusalatið rétt áður en á að borða það, mér finnst fínt að gera það ca. 20-30 mínútum áður. Ef dressingin er látin vera of lengi í salatinu finnst mér það verða svolítið blautkennt. 

Þetta hentar einstaklega vel með öllum grillmat ... algjört lostæti! 

Verði ykkur að góðu, kv. Hilja

Fengið upphaflega hjá vinotek.is

Sumarlistinn 2014

Við fjölskyldan gerðum sumarlista síðasta sumar og það var virkilega gaman að gera hlutina sem voru á honum og krossa við. Þegar sumrinu lauk var síðan vel sýnilegt hvað við höfðum gert yfir sumarið. Við ákváðum því að gera aftur sumarlista fyrir þetta sumar og vildi ég deila því með ykkur. Bæði listanum okkar og síðan tómum lista ef þið mynduð vilja nýta ykkur formið :)




Það er margt hægt að bralla sem ekki þarf að kosta mikið og það verða oft bestu minningarnar. Ég man til að mynda eftir því eitt sumarið þegar ég var um 8 ára að mamma og ég fórum í sundbolina okkar og máluðum hvor aðra hátt og lágt og skelltum okkur síðan í heita pottinn. Þetta uppátæki kostaði ekki mikið en minningin færir mér ávallt bros. Vonandi á sumarið eftir að færa ykkur margar slíkar minningar.

Góða skemmtun í sumar.

Sá Gríski

Við erum afskaplega mikið fyrir góða borgara hér á heimilinu og búum þá ávallt til úr hakki sem er beint frá býli, lang besta hakkið! Í gær bað Grímurinn minn um að við myndum hafa borgara og auðvitað urðum við við þeirri ósk hans. Ég var í miklum sumarfíling í gær því sólin skein og mennirnir mínir í garðvinnu. Borgarinn varð því að grískur. Hann var sumarlegur og fáránlega góður svo ég segi sjálf frá ... ég vildi því deila honum með ykkur. Við familían erum einnig hætt að borða franskar en í gær langaði mig þvílíkt mikið í eitthvað svipað og datt þá í hug að sætar kartöflur í staðinn ... satt best að segja slógu þær í gegn.

Kjötið í borgarann - fyrir 2

400 - 450 g hakk
1 tsk timían
2 msk fetaostur (ég notaði kryddleginn feta)
1 msk Worcestershire sauce (nota hana yfirleitt í borgarana)
salt og pipar

Blandað saman og látið bíða í 40 mín.

Grísk Tzatziki sósa með snúning

1 bolli grísk jógúrt
1 msk fersk basilíka, söxuð
1/2 tsk salt
1 pressaður hvítlauksgeiri
2 msk hvítlauksolía   (má líka vera ólífuolía en setja þá einn hvítlauksgeira í viðbót)
1 msk hvítvínsedik

Hrært saman og látið bíða svipaðan tíma og borgarana.

Grilluð papríka (sett efst á borgarann - ofan á kjötið)

1 papríka skorin í sneiðar - ca. 5 eða 6 sneiðar
 ... sett á hvolf í eldfast mót.
Hvítlauksolía yfir.

Steikt inni í ofni við 220°C og blástur þar til hýðið er farið að svertast. Takið hýðið af papríkunni þegar hún kemur út úr ofninumm.


Samsetning
Ég notaði venjuleg hamborgarabrauð og setti tzatziki sósuna á bæði brauðin. Grænmetið sem fór á borgarann var ferskt salat, lauksneiðar og tómatsneiðar. Síðan kom kjötið og grillaða papríkan þar ofan á. Þá er ekkert eftir nema lokið á borgarann.

Sætar kartöflur - fyrir 2

Ca. helmingurinn af stórri sætri kartöflu, afhýdd og skorin í þunnar sneiðar.
200 gr af kókosolíu (hægt að kaupa kubb af því frá Palmin)

Kókosolían hituð í potti og sneiðarnar steiktar upp úr henni, þerraðar og saltaðar.


Ég er komin með vatn í munninn eftir að hafa skrifað þetta niður ... þeir verða pottþétt eldaðir aftur einn góðviðrisdaginn.

Verði ykkur að góðu!
Kv. Hilja

Æðislegir döðlurísbitar

Ég fékk einu sinni uppskrift að döðlurísbitum sem innihélt verulegt magn af sykri og smjöri. Mér og fjölskyldu minni fannst þeir svo góðir að við gátum ekki séð þá í friði og hættum að gera þá þar sem við áttum erfitt með að hemja okkur ef þeir væru til. Ég settist því niður og skrifaði nokkrar tillögur að því hvernig ég gæti gert þessa biti hollari en þeir væru og eftir nokkrar tilraunir fann ég hina fullkomnu uppskrift. Þeir eru auðvitað ekki hundrað prósent hollir en eftir breytingu er ég hætt samviskubit yfir því að stinga upp í mig mola. Það verra er að þegar ég fer með þá á samkomur fæ ég ekkert heim með mér til að stinga inn í ísskáp og stelast í þá. Hins vegar er alveg frábært að fólki finnist þeir svo góðir að það getur ekki hætt að stinga upp í sig mola og mola.

Hér kemur uppskriftin sem ég er búin að fullkomna svo að okkur líki sem best.

Döðlurísbitar

240 gr döðlur
35 g agave sýróp
80 g kókosolía
4 1/2 bolli af Rice Crispies
200 g súkkulaði (50% t.d.)  - má líka vera suðusúkkulaði.

Setjið döðlurnar, sýrópið og kókosolíuna í pott og hitið. Þegar döðlurnar fara að linast skal byrja að stappa þær og þegar þær eru orðnar að mauki skal taka pottinn af og hræra þar til olían er fullkomlega blönduð saman við.

Setja síðan Rice Crispies út í og blanda saman. Þrýstið síðan blöndunni í ca. 20 x 30 cm form og kælið. Þegar hún er fullkæld skal smyrja bráðnu súkkulaði yfir og kæla á ný. Að lokum skal skera í rísið í munnbita og njóta þeirra til fullnustu.

Verði ykkur að góðu !
Hilja

Tvær fljótlegar

PABBABRAUÐSTANGIR

 Maðurinn minn kom með þessar brauðstangir á borðið einn daginn. Eldri drengnum finnst brauðstangir æðislegar og kolféll líka fyrir þessum.

Byrjað er á því að taka tvær brauðsneiðar og krydda aðra með Roasted garlic and pepper kryddinu sem fæst t.d. í Bónus. Síðan setja ost yfir, krydda aftur og setja seinni brauðsneiðina ofan á. Smyrja samlokuna að utan með íslensku smjöri og setja í grill. Þegar samlokan fer að verða tilbúin skal skera hana í ræmur og snúa sárinu upp og grill þannig ostinn. Um að gera að prófa líka hvítlaukskrydd og pipar saman.

BLÓMKÁLS OG PÚRRULAUKSGRATÍN

Þetta gratín er svo ofur einfalt og fljótlegt að það er eiginlega hlægilegt. Þetta kom til þegar ég átti blómkálshaus sem var að skemmast og bara hálftími í kvöldmat. Þá voru góð ráð dýr ... eða kannski ekkert svo dýr, meira kostnaður við mjólk, púrrulaukssúpu og blómkálshaus.

1 blómkálshaus
1 púrrulaukssúpa
3 dl mjólk eða 2 dl mjólk og 1 dl rjómi
1 msk af rjómaosti skemmir ekki fyrir :)
Ostur ofan á.

Eldaði púrrulaukssúpuna með einungis 2 dl af mjólk og einum af rjóma. Skellti einnig með 1 msk af rjómaosti. Á meðan súpan var að hitna brytjaði ég blómkálið niður í litla munnbita og skar einnig smá af púrrulauk til að hafa með, sirka 2 msk af púrrulauk. Setti blómkálið í eldfast mót, súpuna yfir þegar hún var búin að þykkna og ost ofan á allt heila klabbið. Inn í ofn í 15-20 mín eða þar til osturinn var farinn að brúnast.

Þetta gratín var óheyrilega gott. Hafði með heilveitispaghettí og ferkst grænmeti. Maðurinn minn sem er orðabókaskilgreiningin fyrir óða kjötætu var alsæll með þennan rétt, sem segir mér að þettta var í raun og veru gott, það var ekki bara ég.

Mexikanskur hamborgari með öðruvísi sveiflu

Bjó til þennan yndislega góða og djúsí hamborgara fyrir okkur hjónakornin um daginn og hann rann svoooo vel niður.

Vildi því deila með ykkur uppskriftinni af þeim.

Mexíkanskur borgari

400 gr nautahakk (ég nota alltaf beint frá býli)
3-5 msk Sweet Chili
1 dl mexíkanskur ostur

Blandað saman og búnir til tveir borgarar. Steiktir og þegar þeim er snúið við er skellt nóg af ostsneiðum til að þekja þann velilmandi :)

Á meðan borgarnarnir eru í steikingu er um að gera sósuna og hún heitir :

Grísk taco sósa

3 msk taco sósa (af þeim styrkleika sem þið viljið ... ég með minn viðkvæma maga nota Mild)
4 kúfaðar msk grísk jógurt

Þessu er hrært saman og þá verður hin undursamlega sósa til.

Síðan er bara að púsla borgurunum saman :

hamborgarabrauð (sem ég set í ristavélin)
sósa
grænmeti að eigin vali
borgari
sósa
hamborgarabrauð

Þar sem við höfum hætt því að borða franskar fáum við okkur salat til hliðar :)

Verði ykkur að góðu ... því þeir eru svakalega góðir svo ég segi sjálf frá.

Knús og kram, Hilja.

Nýtt ár - fersk byrjun

Ég tók mér algjört frí frá skrifum í desember enda nóg að gera í vinnu og undirbúningi fyrir jól. Þetta var yndislegur tími með fjölskyldunni og gaman að vinna að því saman að gera jólagjafir fyrir nákomna ættingja, þá helst afa og ömmur. Það er árlegt hjá okkur að gera dagatal fyrir ömmur og afa með myndum af okkur yfir árið sem senn myndi líða undir lok, við það nýti ég Publisher og sendi síðan á prentsmiðju sem prentar út, gormar og gerir naglagat eða hengi fyrir nagla. Þetta nýtur ávallt jafn mikillar hylli.

Aukalega gerði sonur minn bolla fyrir ömmu og afa líkan þessum hér til hliðar sem hann gerði reyndar fyrir pabba sinn í sumar. Núna er drukkið úr nýju bollunum á hverjum morgni og mikil sæla hjá ömmunni og afanum (eða öfunum því tengdapabbi og maður mömmu minnar fengu bolla og mamma mín).

Hann gerði síðan viskastykki fyrir aðra ömmu og afa (pabba minn og konuna hans). Það má sjá hér. Hann teiknaði okkur fjölskylduna. Myndina teiknaði Grímurinn minn á blað og ég tók upp í gegn með textíl penna sem fæst í A4 t.d. Viskastykkið keypti ég í Ikea.



Að lokum langar mig að sýna ykkur púðana sem ég gerði fyrir systur mannsins míns og konuna hennar en þær giftu sig í haust. Ég sá að hluta til um skreytingar veislunnar og þurfti að hylja íþróttafélagsmerki með hvítu þykku efni. Það nýtti ég síðan í það að gera púða og tók um leið nokkur af þeim heilræðum eða skilaboðum sem þær fengu og málaði það á púðana. Ég er mjög ánægð með útkomuna og vonandi eru þær bara jafn ánægðar, mér heyrist það alla vega á þeim. :)

 Gleðilegt nýtt ár og takk fyrir samfylgdina á síðasta ári :) Hlakka til að gera nýja hluti á nýju ári og deila með ykkur.