Þegar ég og Bjössi (maðurinn minn) byrjuðum að búa keyptum við okkur hornsófa í Rúmfatalagernum sem var einnig svefnsófi. Hann var líkt og sniðinn inn í íbúðina okkar á þeim tíma en eftir nokkra flutninga var farið að sjást nokkuð á honum og hann farinn að liðast í sundur. Smám saman hurfu hlutar af honum, fyrst önnur tungan og síðan hornið þannig að eftir stóð einungis svefnsófahlutinn af honum. og að lokum var hann allur tættur í sundur til að gegna öðrum hlutverkum. Þrátt fyrir mikla leit gat ég ekki fundið almennilega mynd af honum en Google bjargar öllu og þar fann ég mynd af honum eins og hann leit upphaflega út.
Við (ég og Bjössi) byrjuðum á því að taka dýnuna úr, rifum hana upp og fjarlægðum tvær raðir af gormum til að fá þá stærð sem við vorum að leita eftir. Því næst reif Bjössi allan sófann upp og tók úr honum alla púða og svampa. Ég tók mig til og saumaði utan um nokkra púða og úr þessu varð "kósý hornið" hjá drengnum okkar. Einnig voru notaðir nokkrir svampar úr sófanum og settir inn í dýnuna til að mýkja hana, sem gerði heilmikið.
En þar eyðir hann orðið dágóðum hluta af sínum tíma þegar hann er inni í herberginu sínu og mesta stuðið er auðvitað að hoppa ofan af hvítu Ikea einingunni (sjá mynd) ofan á dýnuna.
En við vorum ekki búin að nýta allt sem við ætluðum okkur ... því okkur vantaði sessur á útistólana okkar og því var um að gera að nýta svampana úr sófanum og gera þá að stólsessum.
Hér má sjá stólinn eins og hann leit fyrst út og svo eftir að svampurinn hafði verið sniðinn á og saumað utan um hann.
Ég er nokkuð ánægð með hin nýju hlutverk svefnsófans ... þó svo að hann sé ekki lengur svefnsófi er hann enn að gegna mikilvægu hlutverki í lífi okkar, 6 árum eftir kaup.
No comments:
Post a Comment